1283. Februar 18. Breslau.

Der Abt Hartlieb von Leubus und sein Convent bestellen in derselben Sache, nämlich den Zehntstreitigkeiten in Fröbel, Zabierzau und Zuzella, den Otto zu ihrem Bevollmächtigten.

In Nomine Domini Amen. Noverint universi presentes litteras inspecturi, quod nos Frater Harthilibus Abbas Lubensis Cisterciensis ordinis una cum Conventu nostro in causa que vertitur vel verti speratur inter venerabilem in Christo patrem ac dominum Wrat. Episcopum et nos ac nostrum Conventum et parte una, et Prepositum et Magistram ac Conventum de Bozhidom ex altera, Super decimis villarum aut earum parte, in Wroblino de septem mansis, in Zhaborov de octo mansis, in Zhuzhel de tribus aratris, in Radina de sex mansis, fratrem Ottonem Monachum domus nostre presentem et mandatum sponte auscipientem, nostrum facimus, ordinamus seu coustituimus Procuratorem vel yconomum, Sindicum seu actorem, ad eligendum Iudices pro parte nostra de novo et consenciendum in eos, concedentes eidem Procuratori generalem et liberam administracionem. Dantes ei etiam potestatem agendi defendendi vice nostra, excipiendi. replicandi. prestandi in animam nostram et exigendi a parte adversa cuiuslibet generis iuramentum, posiciones et probaciones offerendi, interlocutoriam quamlibet et diffinitivam sentenciam audiendi, et ab ea seu etiam ab interlocutoria quacumque si necesse fuerit appellandi et appellacionem prosequendi, et supplicandi, et specialiter amicabilem concordiam ineundi. si forte pars adversa non strepitu iudiciorum sed amicabili concordia voluerit ipsum negocium terminari, transigendi seu componendi per quemcumque modum, arbitros seu arbitratores, sive amicabiles compositores eligendi seu assumendi vice nostra quoscumque vel qualescumque, et nos ad arbitrium sive laudum seu compromissum servandum obligandi sub quacumque pena ordinaria seu extraordinaria per sollempnem stipulacionem, et ad omnia alia facienda, que per verum et legitimum Procuratorem fieri consueverunt, vel in propria persona possemus facere presentialiter si essemus; Ratum et gratum habituri quicquid factum fuerit per eundem. Nos autem a caucione satisdacionis ipsum relevare volentes, sub ypoteca omnium bonorum nostrorum promittimus pro ipso iudicatum solvi pro omnibus clausulis ipsius si defensioni ipsum contigerit se offerre, et hoc tam ipsis Iudicibus seu arbitris quicumque electi fuerint, quam etiam parti adverse volumus esse notum. In cuius rei testimonium presens scriptum nostri Sigilli impressionis caractere roboramus. Actum in Caminata domini Episcopi in Wrat. Presentibus eodem domino Episcopo, Magistro Andrea Archidiacono. domino Johanne Scolastico, Magistro Johanne Gozvini, et Laurencio Canonicis Wrat. Ecclesie, Magistro Henrico dicto de Calcov, et aliis pluribus, Anno domini m°. co°. lxxx°. tercio, Indictione undecima, xii Kalendas Marcii.

Aus dem folgenden Schiedspruch.
Hugo, I, 486.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.